冇錢就是任性
就為左慳番D裝修費，兩條港燦上左幾年冇去過既深圳鳩嗚----買磚。
之前做定功課睇了BLOG, 多數都介紹田貝四路同寶安北路。
誤打誤撞同埋師傅介紹下，去左兩個地方想同大家分享。如果想買大陸名牌馬可X羅同樓蘭的，可以出番去先........
其實都約左師傅上去揀，因自己有選擇困難症，所以兩個人上左去睇左轉先，唔使猶豫不決浪費師傅的時間。
田貝建材市場本來經羅湖上去，但.....我竟然做左件極柒的事，去到羅湖冇帶身分證!!!!曾經恥笑過人地...估唔到我都有今日。 唯有番番屋企拎番，再上過.....
由旺角坐大巴去皇崗，過左關再上橋去巴士站，坐357 號巴士在田貝站落車。途經車站自己入去下面睇
http://www.huangbus.com/big5/guide_shenzhen.html
好耐冇坐，原來係上車有服務員O黎收錢。大大話話都坐左半個鐘都有。雖然有冷氣，但熱到HIHI。
天真的我以為，田貝即係田貝四路，落左車見對面馬路有個好大的田貝建材中心仲要有冷氣，就走左入去睇。
一入去都好多間賣潔具，馬桶同浴室櫃果D....再行亦有好多間賣磚，佢地好多都砌了一幅出來睇。好好服務，介紹好詳細，兩呎乘一呎的水泥磚同石牆磚，大約開價14-16人仔一件。
本來想砌文化磚做電視牆，見到呢D磚都幾靚，不過後來在福田買了一樣樣但更平的。
Designer 上身地諗過砌木紋膠地版上電視牆 平靚正(完全冇想過用咩貼，點整!!!!) 。旺角見到14蚊塊的，呢度賣5蚊人仔一塊。 後來知道，通常大家樂先會膠地版上牆，屋企好少會咁做。同師傅傾過亦不建議，所以打消了呢個念頭。
老闆好好人，比我地攤晒地下揀 (請無視我隻腳)
另一間在入口左手邊賣磚的，老闆好似大家食個老闆咁既樣。佢砌了幅水泥牆出來，深色地磚做地板，拼上去又幾靚wor
行多幾間，其實賣既野望落差唔多。行左幾層，真係有審美疲勞.....出番去建材中心, 有幾間在路邊的，同一款水泥磚，開價11-12人仔，不過服務態度麻麻。
搵唔到本來想去既田貝四路，後來知道，原來呢個建材中心對面馬路轉個灣 (不過都應該行幾遠o下) 就到田貝四。
離開後打的去左寶安北路，都行左個類似的建材中心(大概係家x居之類)，價值款式差不多。
寶安北我地仲有去左B&Q (百安居) 都算大開眼界，有興趣CLICK入去睇 ---冇錢就是任性，寶安北路B&Q 睇潔具
福田福強路水圍建材市場 (福田口岸十分鐘行到)
之後果次，跟師傅上去。
師傅帶我地去福田，在福民站附近，過左人人樂後面，有大佛口食坊，沿住水圍二街(旁邊係學校)外圍前行，再前個街口有有街市同食店，轉入路口就有一個賣建材的小區。地方比上次去的田貝建才中心細，但磚、鋁窗、潔具、雲石乜都有d。
(可能我地係港燦...鋁窗報價仲貴過香港，後來師傅介紹去大角咀買仲平，遲D再寫)
少d選擇都有好處，唔使揀到頭暈(冇錯，真係會暈的!!!) ，尤其已經心裡有數想要乜的。
賣磚的有兩間比較多款，一頭一尾，價錢比田貝同寶安北平。第一間好多木紋地磚。亞姐仲話早幾日有洋腸o黎買木紋地磚舖全屋牆~~講到好開心~~
後來，去左另一間睇，並且買了廁所磚。中途都有唔少國內人o黎買磚。下圖就是決定會買的牆及地磚。後面較右的係侯選佳麗。不過多謝師傅的意見，前面果塊同地磚襯得靚d。如冇記錯好似11蚊人仔一塊兩呢乘一呎。地磚佢地我介埋一乘一呎，不另收加工費(田貝係要另加的)。
後來仲揀埋同第一張相一樣的仿文化石磚，仲平左。
買完抄低型號是常識吧，雖然最後比乜都係唔知
送貨一噸到九龍約港紙300蚊，只送到地下。如附近有其實野訂左，都可以夾埋一齊送，不過送貨都有D小插曲。
本來，知道上手廁所係磚疊磚，一心全爆廁所。後來師傅話我地知廚房......原來都係磚疊磚的，甚至地下條吸咀都係 @_@(上手租比人真係有咁求其得咁求其，呢單有機會再寫。)
所以.....唯有hold住送貨，幾天後上福田再揀埋廚房磚。
呢堆都係佳麗。本來我係想襯番廁所用灰色的。但白色又好似大路d，彩色格仔又好似好可愛。決定唔到，食個tea諗一諗。廁所果然係思考的好地方，話說去去o下望見廁所牆 (以前唔會留意呢d野的)，乜d磚同我想揀個件灰色有紋一樣的!!。所以即out 了這一件。...
後來師傅見到相都覺得好....特別。
話說今次冇同師傅上去，忘記佢提左我地，廚房最好揀大件易清理的。揀細左希望冇問題啦。
老闆娘比左好多款我地睇，最後揀了紋冇咁深的。
廚房牆同地磚。都係啡啡的，EARTH TONE。
後記:
-冇錢先可以任性(當然有錢可以更任性).......番得大陸買野都係有各種風險，最好問問師傅意見或叫佢介紹相熟的。
-可以好多變數，就例如佢要改日子送貨，你又係咪可以突然改放假去收。送到地下點搬上樓....呢D都要處理。
-後來再去旺角睇，款式差不多的水泥磚，價錢廿幾蚊件。如果數量唔係多，其實都唔算差得遠既，因為又計人仔又計運費
-最好都係問老闆拎個WECHAT/QQ, 尤其物流問題可以溝通到
沒有留言:
張貼留言