收樓後.....發現中伏

是咁的，收到樓，有自己的小天地，本來係開心的開始

因為冇經驗，好多睇樓時冇諗到亦唔識睇的問題出現了。
知道層樓舊，亦知道上手業主都係求其裝修去放租，預左收樓後要去執，不過就發現越來越多小問題 (其實都唔知算唔算小，惟有樂觀D)，咁要裝修既預算又大左。

買賣交易你情我願，我唔可以話中晒伏咁嚴重，不過希望，所位辛苦儲錢買樓既朋友參考下，睇樓時睇真D，問多經紀同業主幾句，有需要O係份約度寫低(雖然唔知有冇用)。

廁所天花
首先，呢個係廁所既天花，影相時已拆左排鋁質假天花。 咦，點解拆完仲有塊木板咁特別既呢，唔通有獎....?

YES!!中獎了，係好大舊既屎----石屎。仲要已經甩左出O黎果隻。真係嚇到個心都離一離呀。

好強大，垃圾剷唔夠招架呢位大佬

抬頭再睇真D，我諗可以咁形容...

本身已經唔係靚，卸左個妝直頭係豬西。
點解會咁.......即係上面滲水....?!

廁所牆同地磚
分別搵左唔同師傅O黎打價，大家不約面同一睇就知廁所係磚疊磚。
即係，上手業主為左唔使比太多錢裝修放租，冇拆底磚，就咁貼新磚上去。雖然無錢就是任性，但我地都好快決定廁所要全爆。

呢張相清楚少少，見到磚疊磚

廚房牆同地磚
全爆廁所同廚房都比較貴，本來諗住忍一忍唔爆廚房。一不離二，廚房當然都係磚疊磚啦。

最後忍無可忍，廚房都O係全爆，仲拿拿臨去HOLD住大陸送落O黎的廁所磚，上福田再訂多批夾埋一齊送。
幸好，加多呢個項目，師傅都係收好合理的價錢。
另外，唔知係咪錯覺，拆左層面磚覺得個廚房大左。

吸吸吸吸吸咀
呢條，呢條係師傅拆野時的發現，留比我地鑑賞O下的文物。
吸咀都係吸上吸，咁多年都咀對咀，真係SWEET 到爆呀你地。

 

因為咁，我地有理由相信，全屋的地磚都係咁。
但再整埋就真係同全爆冇分別了。所以最後都係忍一忍，留佢地一路生路了。

牆身漏水 + 亂九咁O黎的電制

呢個.......係廚房牆身電製，左邊果個已用唔到。
拆開左，濕濕地有水O係裡面既!!!!!!
媽呀~~~我好亂，水制定電制O黎架??? 條水線會漏水呀??? 會唔會電死架??
呢個鍾乳石洞電制間接話比我地知，牆身唔知邊度漏水的。
如事者，又要攪一輪CHECK漏水。

呢一排，係廳既電視櫃後面既電制。據識電既人士透露，右邊兩電制係是9但但拉出來的。
通常呢D情況O係劏房都係咁拖。
另外，冷氣機個電制我每次按都有火花，CHECK清楚後，原來亦係不合規格的....

好~~中伏報告完畢
其實.....我唔知呢D問題，O係舊居屋O黎講係咪算係正常?!

而家裝修進行中，希望O黎緊唔會有更多新奇有趣既問題出現啦。